Туул голын усны чанарын 2017 оны 11 дүгээр сарын төлөв байдал

 

Усны чанарын хяналт-шинжилгээний хөтөлбөрийн дагуу 11 дүгээр сарын 15- 16-нд, Туул голын дагуу Улаанбаатар хотоос дээш, доош хяналт-шинжилгээний 9 цэгээс сорьц авч, усны химийн найрлага, чанарын үзүүлэлтүүдийг тодорхойллоо. Тэдгээр сорьцонд хийсэн шинжилгээний дүнгээс үзэхэд: Туул голын дагуу ууссан хүчилтөрөгчийн горим хэвийн байсан ба голын усны эрдэсжилт, хотоос дээш болон хот орчимд 70- 150 мкСи/см-т, хотоос доош буюу Сонгино доод цэгээс Алтанбулаг хүртэлх хэсэгт 630- 760 мкСи/см-т хэлбэлзэж, эрдэсжилт ихэссэн байв. 

Туул голын усны цахилгаан дамжуулах чанарын 2016- 2017 оны өөрчлөлтийг дараагийн зурагт үзүүллээ.

   

Туул голын ууссан хүчилтөрөгчийн горим хотоос дээш хэсэгт болон хот орчимд хэвийн байсан ба голын ус аливаа үзүүлэлтээр усны чанарын стандарт MNS4586-98 дахь хүлцэх агууламж /цаашид ХА гэх/-аас давсан бохирдолгүй, цэвэр байсан байна.

Улаанбаатар хотын хаягдал бохир ус цэвэрлэх төв байгууламжаас цэвэршүүлэгдээд гарч буй бохир ус нийлснээс доош буюу Сонгино доод цэгээс Алтанбулаг хүртэлх хэсэгт голын усны хүчилтөрөгчийн горим алдагдаж, 1.92- 2.24 мгО/л-т хэлбэлзэж  байсан ба биохимийн хэрэгцээт хүчилтөрөгч /БХХ₅/-ийн агууламж 36.8- 68.0 мгО/л байгаа нь ХА-аас 12- 22 дахин /2 дугаар зураг/, перманганатын исэлдэх чанар /ПИЧ/-ын агууламж 13.2- 32.0 мгО/л байгаа нь ХА-аас 1.2- 3.2 дахин давжээ. Усан дахь аммонийн азот /NH₄/-ын агууламж 13.22- 27.65 мгN/л-т хэлбэлзэж, ХА-аас 26- 55 дахин /3 дугаар зураг/, эрдэс фосфор /Р_эрд/-ын агууламж 1.387- 1.895 мгР/л-т хэлбэлзэж, ХА-аас 13- 19 дахин давсан бохирдол илэрч, голын усны чанар өмнөх сарынхаас буурсан ба голын усны хүчилтөрөгч, органик бодисын агууламж Сонгино доод цэгийн орчим онцгой их бохирдол (цаашид ОИБ)-ын түвшинд, Таван толгойн гүүр, Алтанбулагийн орчим их бохирдол (цаашид ИБ)-ын түвшинд хүрч, эрдэс азотын агууламж 10ХА-аас давж, ИБ-ын түвшинд хүрсэн байна. Мөн Туул голын усан дахь фторын агууламж Таван толгойн гүүрийн орчим, VI валенттай хромын агууламж Сонгино доод, Таван толгойн гүүрийн орчим тус тус ХА-аас давсан бохирдол илэрчээ.

Туул голын усны шинжилгээний 2017 оны 11 дүгээр сарын дүнг усны чанарыг илэрхийлэх гол үзүүлэлтүүдээр MNS4586-98 усны чанарын стандарт дахь хүлцэх агууламжтай харьцуулан 1 дүгээр хүснэгтэд үзүүлэв.  

Туул голын усны чанарын шинжилгээний дүнг усны чанарыг илэрхийлэх гол үзүүлэлтүүдээр усны чанарын стандарт MNS4586-98 дахь ХА-тай харьцуулан дараагийн зургуудад харууллаа.